我地同事一行三人 上星期一齊前往左沖繩宮古島🥳
主要係體驗Oceans’ Resort既露營車——Oceans’ Drive😍
時下年輕人最鍾意就係貪新鮮 試下D新既體驗😏
係宮古島揸住車周圍去 周圍訓 周圍食 又係一個咩體驗?
露營車套票詳情👉🏻http://bit.ly/miyakojima_camping_car
Ocean's Resort Villa Vorla 套票詳情👉🏻http://bit.ly/miyakojima_oceans_resort
【香港直飛宮古下地島機場🛫】
現時乘香港快運直飛沖繩宮古島只需兩個小時左右 真係同飛去台灣差唔多時間!
【低門檻租用露營車🚚】- 只需持有兩年自動波私家車國際車牌
一落機, 就已經有專車接左我地去攞車, 從下地島機場前往Ocean’s Drive露營車車場約20分鐘, 途中會經過日本最長既免費大橋——伊良部大橋, 大橋既兩邊已經係清澈見底既玻璃水!! 就咁見到已經好想停低影相!橋上仲有幾個避車處, 專登為左提供位置比大家停車影相! 到達停車場之後, 只需簡單既登記及講解程序, 就已經可以開車出發, 進行你既專屬旅程!😍
【非常舒適既車箱❤】
打開露營車的車門, 入面木色既裝修令人覺得非常溫暖, 車箱內設有鞋櫃, 雪櫃, 洗手盆, 充足的櫃子, 叉電位, 檯, 梳化, 可獨立開放的冷氣系統, 以及三張床(最多可訓到5個人), 其中一張係由梳化同檯「變身」既床, 非常舒適。但需要留意, 車箱的冷氣系統滿電既狀態下, 只可以獨立開放約6個小時, 如果你係好怕熱既人, 可能就要去返車場叉住電先可以開足成晚冷氣啦~🌬
【玩在宮古。宮古之藍🌊】
有人話, 宮古既藍色係全世界最靚既藍, 指緊既係宮古島海既藍色! 黎到呢到緊係要去宮古島必到既各個風景如畫既白沙灘啦! 宮古島周圍都係水清沙幼既沙灘, 淨係睇到咁清咁藍既海已經忍唔住想快D換衫落去游水🥳! 而我地第一個去既沙灘就係「吉野海岸」,吉野海岸係一個比較少人去既沙灘, 但卻係一個好好既浮潛潛點, 除左有得租借浮潛用具, 沙灘遮之類物品, 水底亦有大量既珊瑚礁, 孕育了不少熱帶魚群🐠🐟, 可以見到「mo仔🐠」之外, 仲有機會同海龜一齊游水!! 浮潛完仲可以攤係個沙灘到晒下太陽。臨走前可以用水喉輕輕沖下身, 然後揸5分鐘車左右就已經可以返到去露營車車場沖涼!
另外, 宮古島亦都有數個外島, 而其中兩個好值得去既就係池間島同埋來間島, 呢兩個島都係靠大橋黎連接本島, 而且由車場出發路程比較遠(約40分鐘車程), 乘客可以係路程中...繼續訓😂 (辛苦司機了)。去到池間島之後, 你既左手邊就已經有幾間既精品土產店, 當然唔少得沖繩既守護神——SHISA!! 入面除左有多各式各樣既手信可以買返屋企之外, 仲有好多野食, 其中一間仲有53種海鮮丼!!全部都係500yen渣(HK$35)🤤🤤!! 真係非常之抵食。食完野仲可以上去觀景台最高層, 鳥瞰旁邊既沙灘同埋池間大橋既景色, 上黎影相打卡真係一流。 係池間島, 仲有好多隱世既小沙灘, 可以靜靜地係到chill下hea下😎。
你又知唔知被譽為全日本最靚既沙灘就係宮古島既「與那霸前濱沙灘」, 全個沙灘長約7公里, 面對來間大橋, 除左有例牌既水清沙幼之外, 仲提供不少水上活動, 如浮潛, 水上電單車, 香蕉船, Flyboard等等既水上活動, 玩完之後仲可以比100yen去廁所沖完身先再離開! 吸引左不少遊客前來打卡, 難得黎到宮古島既你又點可以唔黎呢😜。
仲有一個地方係黎到日本都一定要行既就係——驚安之殿堂! 呢到真係乜古靈精怪既野都有!! 而我地黎既目的...係搵煙花🎆!! 因為係香港又唔放得煙花, 難得黎到D可以合法放煙花既地方又點可以唔放呢~ 我地買完煙花之後, 入夜後去與那霸前濱沙灘個邊放煙花, 雖然我地買既野係係地下放既煙花, 但都係過癮既~
【食在宮古😋】
黎到日本, 第一時間就緊係去食好西啦, 好多人會選擇攞完車之後, 就去距離同露營車埸5分鐘車程既一個小型既購物地帶食野先, 入面有Pizza店, 拉面店, 牛排, 烤肉等等。而去得日本, 就緊係食返正宗既日本拉面啦!! 我地就簡左呢間追風丸拉面, 價錢抵食之餘, 而且每個拉面都各有特色, 而日本拉面最難得既就係, 佢地個湯真係用心調製出黎, 真係飲晒佢都完全無問題啊!!
我地亦都試左追風丸附近既一間溶岩石牛排, 鍾意食肉食牛排既朋友都好值得一試, 而且價錢中等, 仲可以任飲湯, 任加飯同任食沙律等前菜。
食完野仲可以行下黎日本必行既24小時AEON! 黎日本點可以唔行AEON, 野食野飲平之餘仲非常高質, 係到買定一大堆零食宵夜, 夜晚就可以開party啦! 除此之外, 因為宮古島既食店好多都比較早關門, 我地8點幾出到去好多店舖已經關門, 如果你想食心水食店既話, 最好就早D出定去市區「搵食」啦。一旦好似我地咁, 太遲先出黎點算? 都唔洗擔心, 日本一日有AEON, 一日都唔會餓死你既! 可以學下我地咁, 去AEON買便當叮熱黎食, 而非常值得一提既係AEON既蒲燒鰻魚!! 大大條, 又厚身, 又入味, 都只係1000yen(約70港元), 非常抵食, 我地三個人, 食完一條都唔夠! 又加碼食多一條!! 真係回味無窮!
去到宮古市區, 附近都有好多精品店, 黎呢到一定會買到啱你既手信, 同埋一定要食沖繩著名既海鹽雪糕, 真係會一試難忘。我地仲係市區呢邊食左一間隱世高質烤肉店——大空豚焼肉!! 價錢偏貴, 但絕對物超所值, 採用上乘既牛肉, 超多肉汁, 非常好食, 我敢講係我今年食過既好食既燒肉! 真係非常難忘
【Ocean’s Resort🏨】
我地住左兩晚露營車之後, 我地仲體驗埋住一晚Ocean’s Resort Villa Vorla, 房間空間非常充足, 有私人泳池(10-4月唔開放), 私人按摩池,智能廁所(表示好過癮), 日式浴室等特別既設施。
另外Ocean’s Link入面仲有個非常大既高爾夫球場, 佔地842,895㎡, 共18個洞, 而且價錢便宜合理。場內更有過百隻野生孔雀(小弟都係第一次親眼見野生), 雖然就睇唔到佢開屏, 但都係難得既~ 而且附近就係海邊更可以俯視整個吉野海岸及一片無邊際的海洋!! 在高爾夫球場的這邊, 有一個渡假村既面海既私人浴池, 提供比各位客人打完波或者玩完一日之後黎呢到鬆一鬆! 租用露營車既客人可以用500日元就可以享用呢個日式既浴池及桑拿。澡堂既樓上係一個海景餐廳, 景觀超正!! 整條海岸線一覽無遺, 係到享用早餐都係種好好既享受!!
【總結😝】
宮古島係一個放鬆心情, 洗滌心靈既好地方, 由奇好似小編呢D熱愛海洋既人, 真係可以全日留係一個海灘耍廢耍足一日都無問題, 加上依家出左直航機, 套票價錢非常抵玩, 係平遊日本既最佳選擇, 而且仲要好食好住好玩, 真係可以當去台灣咁去都得。自駕遊方面, 黎沖繩呢D偏遠地區, 真係好需要一個司機朋友帶你周圍去, 小編第一次去沖繩本島既時候都好難搭車去到想去既地方, 何況係再偏遠D既宮古島呢? 而今次我作為一個露營車既乘客真係表示非常爽!! 因為係司機揸緊車去下個景點既時候, 我仲可以把握時間訓教同做自己野, 訓醒又可以繼續玩, 玩完又繼續訓, 呢種豬一般既生活真係非常開心, 哈哈🤩。
露營車套票詳情👉🏻http://bit.ly/miyakojima_camping_car
Ocean's Resort Villa Vorla 套票詳情👉🏻http://bit.ly/miyakojima_oceans_resort
